三年前在元朗721襲擊案中無故被打到背部開花的蘇梓朗，明言對三年來政府和警方追討事件的表現「唔收貨」，因為幾百名白衣人中只有7人判監，行動由誰人組織和策劃亦不了了之。
。。。。。。。。。。。。。。。。。。。。。。。。。。。。。。。。
就元朗721無差別襲擊事件作三周年的報道，記者聯絡社區工作者協助連繫當日無辜被打的市民做訪問，並希望找到傳媒未曾訪問過的，但傳來消息指，在今天的政治社會氣氛下，受害者大多不敢或不願接受訪問。
最後，仍是三年前721當晚，下班經過元朗鳯筱北街時被白衣人無故地打到背部開花，及後多次接受傳媒訪問的年青廚師蘇梓朗，願意接受訪問。甫見面，記者先感謝他的敢言，他的即時反應是：
「被冠以『敢言』之名好諷刺」
「真係好諷刺！只係做個訪問啫，係我自己比人打完，講返件事，仲好似好敢言咁，仲被冠以『敢言』之名。」略帶稚氣、說話坦率並開朗的26歲廚師面帶苦笑地感嘆。
蘇梓朗自小住在元朗，現時跟三年前一樣，在Yoho商場一家餐廳當西式兼日式餐飲的廚師。他說：「我住喺元朗，又喺元朗返工，元朗竟變成最危險嘅地方。」
蘇梓朗事發當晚從餐廳下班後，穿過元朗人俗稱「雞地」的鳯筱北街，見到眾多穿白衫的人，只因說了一句「哇，真係好多著白衫o既人」，即時被十多二十名白衣人以藤條木棍狂毆，追打幾條街，又用腳踢，最後倒地才停手，背、手、腳已滿佈傷痕，而背部花斑斑的傷痕照片曾經震撼過許多手機接收者。（見下圖，香港電台鏗鏘集截圖）
這樣恐怖的經歷帶來的身心靈創傷，三年後已能被時間療癒了嗎？
「好返晒喇，其實受傷後三個月至半年後都已經好返，背脊好似新嘅一樣，但腳就傷得最犀利，因為係踢傷，軟組織劇痛，痛到瞓唔到。」
身體大約三個月後復元，精神亦能同步康復，只因生性樂觀：「我仲好樂觀，冇乜好大嘅陰影，之後返工放工要行返同一條路，都冇乜大反應。」
但能像蘇梓朗一樣堅強硬朗的受襲者也許不屬多數。
蘇梓朗和一群當日被襲的傷者，包括前立法會議員林卓廷，曾聯合一起，由林牽頭入稟控告時任警務處處長的鄧炳強，指控警方在事件中沒有履行保護市民的職責，須作出賠償。但去年中因林卓廷背負多宗政治控罪，亦考慮到訟費問題，而集體決定終止索償。
蘇梓朗指出，其實此前已有其他原告人陸續退出，原因眾多，包括司法和法治的環境越來越不明朗，勝訴不高。仍然要繼續生活的話，便不想兼顧官司的煩人事務；另外是他聽聞當中很多人心理陰影極大，不想再提起721事件。
「叫我唔好糾纏於721要向前看，唔make sense」
對於突如其來承受無妄之災，無緣故被暴打，最心靈堅強的人都無法承受事件不了了之，所以，回想前政務司司長張建宗曾經發表不要糾纏於721事件而要向前看的言論時，蘇梓朗非常不滿：「我只係放工經過，就遇到無妄之災，令我個幾月返唔到工，連錢（賠償）都唔比返我，張建宗仲叫我唔好糾纏於721，要向前看？（錢）係最勢利，最現實嗰部分，但亦係最基本……佢地（政府）有能力（追討案件），但你唔做，你叫我向前看，唔make sense囉。」
他對於三年以來，只有7名白衣人襲擊者被判刑入獄，明言「唔收貨」，未能真正追討公道。
「當日幾百人（白衣人），只係拉咗（落案控告上庭審訊）8個（編者案：7人入獄1人無罪釋放）。三年喇，（政府）做咗乜？只係拉咗8個，當日打我嘅都唔只（8個）啦，估計都有十幾二十個。而家，好似將721冷處理，調查？得個講字，實際仲有幾十個，幾百個呢，點呀？唔知，唔理，（當局）希望過咗啲時間之後，人就忘記件事。」
「仲有，成件事背後係點發生㗎？全部著晒白衫，係咪有組織呀？只係話調查緊，但係乜都冇。」（參考另文詳述721案未理清的三大疑團）
「有幾多做幾多，至少令人唔好忘記件事」
三年來香港的政治環境墮入深谷，隨著國安法於2020年訂立之後，以言入罪的個案接續而來，當日被打的林卓廷亦已由原告變了被告，反過來被指參與暴動罪，全城籠罩在靜默的氛圍下，以致721的受傷者大多都不願接受訪問。
面對自感公道追討未遂，公義仍未彰顯的當下，蘇梓朗自言不會放棄，但卻知可做的不多：「我能力有幾多就做幾多，例如接受傳媒訪問，所以近日有傳媒邀請訪問我都答應，或自發在討論區講返三年前發生過乜事。實質作用係唔大，但唔好話係為乜吖，就為我自己，要多啲講比人聽，至少令人唔好忘記件事。」
「可能只係一個fantasy（幻夢）——有一日，全部識穿咗係邊個組織，邊個策劃721，全部拉晒坐監，（可能係幻夢唔會實現），但我唔想放棄，而同時又要繼續生活下去。」
不放棄追討事件，現在於言論和行動受限之下卻又不無危險，同時又要繼續安好地生存下去，似乎很矛盾。那有否想過像許多年青人一樣，陸續離開香港投奔自由？
蘇梓朗顯得十分猶疑，因為這是個重大轉變，亦不知能否習慣新的文化，必須有詳盡的計劃才行。
「實有諗過（移民）嘅，但如果自己仍可以喺香港生活多一排，冇迫切需要走嘅話，都唔想走住。」
至此，記者聯想到今年初俄國入侵烏克蘭後近兩個月，雖然烏國多處被炸得爛蓉蓉，但逃難到國外的部分烏克蘭人卻陸續返回戰亂的家鄉，因為意識到戰爭可能曠日持久，寧願選擇在家鄉面對危險，而不願長久留落他方。逃難求生與依戀家園之間的內心矛盾與拉据，可哀是每個受壓地方人民的共同命運。（參考紐約時報報道）
